تخزين الالعاب في غرفة المعيشة

هداوي كوم · 02-20-2012, 08:06 PM

,

دايما نطمح ونسعى لبيت مرتب ..

خالي من الكركبه ولعب الاطفال ..

وخصوصا ونحنا عاملين لهم غرفة العاب خاصة فيهم !!

بس ياترى هل الالعاب تقعد بس في غرفة العاب ؟!

ام

تتطلع وتتمشي في انحاء البيت .. ؟

خليني احدد ..

تتطلع وتتمشى ورانا فين ما كنا

يعني دايما الاطفال يحبوا يقعدوا مكان في احد وخصوصا مامتهم

ومن المستحيلات يقعد في غرفة لوحده ~

حتي لو كانت مليان العاب ..

طيب ايش يسير !؟

تفضل الام المسكينة راحية جاية .. جاية راحية ~

تودي الالعاب غرفة الاطفال ..

تخاصم هنا .. وتزعق هناك .. " شيلوا يا بزورة العابكم .. لا تخلوها متنتورة في البيت "

وطول النهار على دا الموال ..

وما تفرح ترتب الغرفة .. وتبغي لحظات من السكينة ..

بجد انجاز .. رتبت الغرفة ..

~

الا سويعات .. وتتدخل لعبه صغيرة من هنا ..

وتسير الغرفة بدا المنظر ~

اعتقد انو الكل حاس بكلامي .. ويقوول ايييوا .. هو ذا اللي يصير !!

طيب ايش الحل ..

ظهرك انكسر من الروحة والجية والترتيب ..

انا اقولك ..

لازم تؤمني ان الالعاب راح تنشر في غرفة الجلسة الحلوة ~

وتدخل كل يوم الغرفة .. مهما حاولتي انك تقصي رجلها ..

وانك ترضي بالواقع وتتعاملي معاه ..

وخصوصا اللي عندهم اطفال كتتير ..

لازم تعبي نفسك وتجهزي روحك ..

بسلات خشب , بسلات كبيرة صغيرة .. بعلب

وتحطيها في غرفة المعيشة ~

عشان الالعاب الي تدخل الجلسة .. تتخزن في الجلسة ~

بدل ما تروحي وتجي .. وتجي وتروحي لغرفة الاطفال ..

طلوا معايا يا امهات .. ويا امهات المستقبل على غرفة الجلسة .. الجميلة والرايقة ~

حلوة وبسيطة .. ونعومة ..

وما فيها اي شي مشوه المنظر ~

وتحوي لك انك عمليه وفيها ريحة طفولة .. ومغرية للاطفال ..

حتي الخداديات تنطق من الالوان ..

وقطنية ومريحة .. ومافيها خرزات ولا اشياء قابلة للبلع ..

+

اذا اتوسخت بس ترميها في الغسالة . .

شوفوا المفاجاة ,,

الكنبة بكبرها .. تنفتح وتقدري تحطي جوتها اغراض ~

ما احد فكر فيها صح .. ولا جى على باله يشتري زي كذا !!

بجد ما نفكر في كيف نخزن اشياءنا .. ولمن نجي نعمل البيت ..

ما تخطر على بالنا .. نحط لها اي اهتمام ..

اهتمامنا شكلي وخارجي وسطحي فقط !!

ما نفكر عميق ..

يعني مو بس للقعدة ..

تفتحي غطى الكرسي .. وترمي في الالعاب المرميه في الارض .. بدل ما تروحي غرفة الاطفال وتضربي مشوار ~

حتي الطاولة اللي في نص .. تنفتح ..

هما هنا حاطين مجلات .. ممكن انتي تعبيها العاب ~

وممكن تستفيدي منها لنفسك .. وتحطي فيها اغراضك ..

حتي الطاولة تنفتح .. وتقدري تعبي فيها الالعاب ..

افضل انها ما تكون شفافة .. يكون شكلها احلى ~

ذي الارفف والبوكس المعلقة جدا عجبتني ..

تنفتح كمان .. وتقدري تحطي فيها العاب اطفالك ..

يعني عندك كذا خيار .. كيف تخزني الالعاب ..

بدل ما تكون مرمية في كل مكان ..

او لمن ما يكون لها مكان اصلا ~

كتير ممكن يقولون انو غرفة المعيشة .. مفروشة .. وكل شي موجود ؟!

يعني مثلا اغير فرش الغرفة كامل ؟

وذا شي مستحيل ..

لكن ممكن تاخدي افكار ..

وتطبقي فكرة وحدة .. مو شرط كل الغرفة تنقلب وتتغير ~

وخصوصا السلات والعلب .. جدا عمليه ..

وتحصلي منها كتتير

الكنبات المتحولة ..

ذي طاولة الكوفي .. اللي في غرفة الجلسة تنحط ..

بدل الطاولة الخشب او القزاز .. الغير عمليه ..

ويمكن كمان الطفل يتعور بحافتها ..

يعني ذي مقدورة انو الواحد يغيرها ..

في سبيل راحته ..

نفس الطاولات الي فوق .. بس هنا عملوها كنبه جانبيه .. ورصوا عليها مخدادات ..

يعني اذا ما حابه تغيري طاولة الكوفي ..

ممكن تشتري ذي الطاولة [ الكنبه ] .. وتحطيها على ركن في الغرفة ..

او في الزاويا ..

نفس الفكرة .. بس جوا مقسمين ..

اشكآل زيها ~

السلات ~

موجود اشكال والوان

واعتقد تقدري تحصلي عليها بسهولة

بس جدا عمليه ..

يعين لا يحتاج تغيري اثاث ولا شي ..

وبعدين ترصيها في مكتبة غرفة المعيشة اذا عندك ~

او ممكن تضيفها ..

مثلا ..

في الصورة حاطين مكتبة كبيرة ..

وراصين جوتها السلات ..

وحاطين الالعاب داخلها ~

بس انا اشوفها تشوه منظر الصالة ..

وتفقد المنظر الجمالي تبعها ..

يعني انا نفسيا .. ما احب اشوفها ظاهرة . .

<<< لنفسي .. مو عشان لو احد دخلها .. او ضيوف جوا عندي

افضل سلات سوداء .. ما تبين ايش جوتها ~

وعشان اغريكم بفكرتي زيادة

ادعمها بالصور ..

وراح تشوفوا الفرق ..

وهنا يطلع حسك بالديكور .. وحسك بالقعدة حقتك كيف تبغيها تكون ~

سلات زيها زي الي فوق .. غير شفافة ..

والمنظر فخم ورايق .. وحق غرفة قعدة ..

وما اثرت العاب الاطفال شكليا عليها ~

بس شايفين جوا السلات .. الالعاب ..

شكلها غير ظاهر .. وذا اللي عجبني ..

تكيه صغيرة جنب التي في ..

تنفتح .. وتقدري تحطي جوتها الالعاب ..
بس ما تخطر على بال احد ..

طيب نفترض ما تقدري تشتري مكتبه جديدة .. وتحطي جوتها السلات ..

تحت طاولة الكوفي .. حطي السلات ..

بدا الشكل ما راح تتكلفي شي ~

وفي النفس لقيتي مكان تخزيني فيه الالعاب ..

شكل الكتب حلو .. بس كمان لو تنفتح ..

يعني بصراحة الحركة خنفشاريه ..

سرير البيبي ~

دايما مكانه يكون في غرفة نوم الابوين .. طبعا على حسب مو شرط !!

يعني ما احد يفضل انو البيبي المولود يكون له غرفة لحاله ~

وغرفة النيرسري .. نادرا ما احد يفضلها او يعملها لطفله ..

فما دام سرير البيبي .. مصيره غرفة امه وابوه ..

اهم شي يكون في سبيس للسرير ..

مو شرط يكون فخم وكبير .. وخصوصا لمن تكون الغرفة صغيرة ..

فالتالي راح يكون منظر الغرفة زحمة والتنقل فيها غير مرييح ~

بس انا ابغي اركز على نقطة ال Space !!

واللي كتتير غافلات عنها ~

[ يعني الي عندها مساحة بالغرفة .. تاخذ راحتها ]

مثال ~

حلوين كتتير ..واي وحدة يمكن تعجبها ..
طبعا في اشكال تانية كتتيرة .. مو شرط الي اخترتهم

بس اذا كان مساحة الغرفة صغيرة ..

افضل لك انك تختاري شي خفيف وصغير وعملي ..

زي كدا ~

صغير وعملي ..

+

ما ياخذ مكان

طبعا ممكن تزينه .. زي ما تحبي ..

بس بجد عملي ..

يعني مو شرط المساحة ..

بس السرير متحرك ..

ودا شي ايجابي زيادة عليه ...

يعني ينفع للحالات الطارئة ..

لمن بابا يكون تعبان ومتازم من البيبي وبكاءه اخر اللليل ..

ويكون عندهم دوام ..

وبدل الماما ما تخرج وتتسحب وتاخذ البيبي معاها وتروح غرفة المعيشة

وتحطه على الكنبه الين ما ينام

وتشيل هم اذا شالته يصحى ~

هنا السرير المتحرك تجي فايدته ~

يتنقل في كل انحاء لبيت ..

يعني على قول المثل اثنين في واحد

خفيف وصغير + متحرك

نجي لنقطة تانية ~

فين تحطي ملابس البيبي واشياءه ؟!

اكيد في دولاب .. او دولاب صغير ..

برضوا ارجع انبه انا بتكلم عن الناس اللي ما عندهم مساحة في غرفتهم
[ يعني الي عندهم مساحة خير وبركه ]

فالتالي اذا اشتريتي دولاب صغير ..

منظر الغرفة راح يتشوه + يسير زحمة ..

طيب ايش العمل ؟!

انك تشتري سرير .. ويكون فيه مكان للتخزين .. او ادراج

زي كدا ~

يعني هوا السرير ياخذ مكان + فيه كم درج تحطي فيه اغراض البيبي ..

طيب نفترض انك اشتريتي السرير وادبستي ~

ترجعي تشتري واحد تاني .. ؟؟

طبعا لا ..

عندك كم طريقة تحطي فيها اغراض البيبي .. بدون ما تشتري دولاب جديد ..

دوري مكان فاضي في دولابك .. وعلقي عليها دا الشي البيبي الي في الصورة

السلات ..

ممكن تحطيها تحت سرير البيبي ..

زي في الصورة .. بس هنا مستخدمة سلات حديد

ما انصح فيها ..

لانها ممكن تدخل الغبرة ...

السلات اللي في فوق .. مبطة بقماش .. ويجي معاها غطى ..

افتراض اخير ~

نفترض انو ما في مكان في دولابك ..

دوري اي مكان في البيت فاضي .. ورصي فيه ملابس البيبي ..

شايفين.. اي دولاب ..

هنا استفدت من درج الدولاب ..

وممكن تحطي فيها اغراض البيبي .. وملابسه واشياءه ..

اتمني انكم تستفيدوا بالافكار ..

وتساعد الكثيرات في تنسيق وترتيب بيتها ..

A3zf 7zn · 03-25-2012, 04:50 PM

رآئعه بروعت حظوركِ

لآعدمنآكِ ولآعدمنآ فوح عبيركِ

كل آلود وآلآحترآم لكِ

هداوي كوم · 03-25-2012, 06:31 PM

أأأأأأأأأأأأألف شكر وشكر خيؤؤ ع حضورك للموضووع ......

شكرا لمرورك على موضوعي وهذا شرف لي ووسام على صدري ....

تحياتي:هداوي كوم..